Yemen,(insidesomalia.org)-Waxaa dib u dhac uu ku yimid kulan Dalka Yemen lagu dhex dhexaadin lahaa Mas'uuliyiinta Isbaheysiga dib u Xoreynta ee uu hareeyay khilaafka xaga fikirka ah.

Xubno uu horkacayo Sheekh Shariif Sheekh Axmed oo ah Gudoomiyaha Isbaheysiga ayaa gaaray Dalka Yemen Magaaladiisa Sanca, kuwaasi oo ka qeyb galaya wada hadalada lagu heshiisiinayo Isaga iyo saaxibkiisa Sheekh Xasan Dahir Aweys oo mad madow uu soo dhex galay tan iyo markii uu bilowday Shirkii dib u heshiisiinta ee Dowladda iyo Isbaheysiga ee ka dhacay Dalka Jamhuuriyada Jabuuti.

Shirkaas lagu dhex dhexaadin lahaa dhinacyadaas ayaa u baaqday arrimo farsamo awgeed, waxaana la tilmaamay in wali shirka aysan soo xaadirin Kooxda Asmara ku sugan ee uu horboodayo Sheekh Xasan Dahir Aweys.

Dhex dhexaadinta dhinacyadaas ayaa waxaa garwadeen ka ah Siyaasiyiin, aqoon yahano iyo Culumaa'udiin ka baxay Gudaha Soomaaliya iyo qaar ka yimid dibeda.

Daahir Maxamuud Geelle oo ka mid ah Isbaheysiga dib u xoreynta ayaa ku macneeyay dib u dhaca kulanka dhex dhexaadinta mid xaga duulimaadka ah, isagoo intaa ku daray in hakad ay ku timid diyaaradii ka imaan laheyd Asmara waa sida uu hadalka udhegeye.

Si kastaba ha ahaatee waxaa dhegta loo taagayaa wada hadaladaas lagu dhex dhexaadinayo Isbaheysiga oo tan iyo markii heshiiska ay gaareen dhinacii Sheekh Shariif horkacay ee Jabuuti ku sugnaa iyo qeybta kale ee Shekh Xasan Dahir hogaaminayo isku khilaafeen,taas oo keentey in loo qeybsamo Asmara iyo Jabuuti.